1. Bosh sahifa
2. Yangiliklar

“Оналарга эҳтиром” фестивали – қутлуғ мақом соҳибаларига юксак эътибор рамзи

“Оналарга эҳтиром” фестивали қутлуғ мақом эгаси бўлган азиз оналаримизга халқимизнинг юксак меҳри ва эътибори рамзи сифатида ўзгача шукуҳ билан ўтказилмоқда.

Учкўприк туманида ҳам фестиваль доирасидаги маънавий-маърифий тадбирлар, кўрик-танловлар, ижодий учрашувлар, турли ижтимоий акциялар ва концерт дастурлари кўтаринки руҳда давом этмоқда.

Юксак инсоний фазилатлари, самарали меҳнат фаолияти, оилада фарзандлар тарбиясидаги ибрати билан эл назарига тушган, юрт равнақи, Ватан тараққиёти учун камарбаста бўлган фидойи фарзандларни вояга етказган оналарга, опа-сингилларга ҳурмат ва эҳтиром кўрсатилмоқда.

“Давр” тантаналар саройида ўтказилган фестивалнинг туман босқичи ҳам ўзига хос байрамга айланди. Секторлар раҳбарлари ва кенг жамоатчилик вакиллари иштирокида ўтган тадбирга 53 та маҳалла фуқаролар йиғинидан 200 нафардан ортиқ онахонлар таклиф этилди. Улар сектор раҳбарлари томонидан карнай-сурнай садолари остида эҳтиром билан кутиб олинди.

Туман ҳокими Аброржон Асқаров ушбу фестиваль меҳридарё ва бағрикенг оналарга ҳурмат ва эҳтиром рамзига айланганини таъкидлаб, ўзининг самимий табрикларини изҳор қилди. Уларнинг ҳар бирларига алоҳида эҳтиром кўрсатиб, гулдасталар ва эсдалик совғаларини тақдим этди.

Мўътабар оналарнинг бу каби эҳтиромдан, эъзоздан кўнгиллари қувончга тўлиб, юртга тинчлик, дастурхонларга тўкинлик тилаб, дуога қўл очди.

Самимий меҳр ифодаси, юксак эҳтиром рамзи сифатида оналарнинг чинакам байрамига, шодиёнасига айланган фестиваль доирасида турли номинациялар бўйича ғолиблар аниқланиб, эсдалик совғалари билан тақдирланди.

Оналарни улуғлаш ва шарафлаш, уларга меҳр ва эҳтиром кўрсатиш, қутлов совғаларини улашиш имконини бераётган, бу каби ишларни эзгу анъанага айлантираётган фестиваль тадбирлари давом этмоқда.