1. Bosh sahifa
2. Yangiliklar

“Эзгулик – шиоримиз, маърифат – қуролимиз” шиори остида маънавий-маърифий тадбир ўтказилди

Шу кунларда Республика Маънавият ва маърифат маркази томонидан Фарғона вилоятининг шаҳар ва туманларида “Эзгулик – шиоримиз, маърифат – қуролимиз!” шиори остида маънавий-маърифий тарғибот тадбирлари ўтказилмоқда. Унда пойтахтдан ташриф буюрган “Маърифат” тарғиботчилар жамияти аъзолари, таниқли олимлар, шоир ҳамда санъаткорлар иштирок этмоқда.
Учкўприк туманида ташкил этилган шу каби тадбирга маҳаллаларда истиқомат қилаётган хотин-қизлар, оила бекалари, фан, таълим, маданият каби йўналишларда муваффақиятга эришган қизлар таклиф этилди.
Байрамона учрашувда Ўзбекистонда хизмат кўрсатган артист Ҳамиджон Тошпўлатов, фалсафа фанлари доктори Шаҳло Аҳророва, шоир Дилшод Ражаб, хонанда Азиз Ражабий сўзга чиқиб, аёл-қизларимизнинг ўқиб, олий маълумотли бўлиши, касб-ҳунар эгаллаши оила бахти, фарзандлар камоли учун, шу асосда бутун жамият равнақи учун хизмат қилишини қайд этишди.
Таъкидлаш керакки, мазкур тадбирдан кўзланган мақсад юртимиз аёлларига ҳурмат-эҳтиром кўрсатиш, уларнинг жамиятдаги ўрнини юксалтириш, хусусан, оилаларда фарзанд тарбиясида оналарнинг ўрни алоҳида эканига урғу бериш, халқимиз ва ёшларимиз онгу шуурида ватанпарварлик, юртга садоқат туйғуларини янада камол топтиришдан иборат. 
Тадбирда мамлакатимизда хотин-қизларимиз учун ҳам муносиб шароитларни яратиб бериш, уларни ҳар томонлама қўллаб-қувватлаш давлат сиёсатининг муҳим йўналишига айлангани таъкидланди. Давлатимиз раҳбари ҳам жорий йил 7 март куни Халқаро хотин-қизлар кунига бағишланган тантанали маросимдаги нутқида бунга алоҳида эътибор қаратди. Барча аёлларга мурожаат қилиб, маънавий тарбия ишларини энди мутлақо янгича усулда олиб бориш, “Эзгулик – шиоримиз, маърифат – қуролимиз” деган ғоя асосида бу жараённи аввало оиладан, маҳалладан бошлаш борасида вазифалар белгилаб берилди. 
Наврўзи олам билан уйғунлашган бугунги маънавий-маърифий тадбирда ҳам концерт дастурлари ва самимий суҳбатларга ҳамоҳанг тарзда “Эзгулик – шиоримиз, маърифат – қуролимиз” деган ғояга алоҳида урғу берилди.