1. Bosh sahifa
2. Yangiliklar

Эҳтиёжманд хотин-қизларнинг бандлиги таъминланмоқда

Учкўприк туманида оғир ижтимоий аҳволга тушиб қолган, ногиронлиги бор, кам таъминланган, фарзандларини тўлиқсиз оилада тарбиялаётган хотин-қизларни аниқлаш, уларнинг муаммоларини ўрганиш ва ҳал этиш борасида самарали ишлар амалга оширилмоқда.
Ана шу эзгу ишларнинг давоми сифатида “Аёллар дафтари”га киритилган хотин-қизларга Маҳаллабай ишлаш ва тадбиркорликни ривожлантириш агентлигининг Аҳолини тадбиркорликка жалб қилиш жамғармаси маблағлари ҳисобидан замонавий тикув машиналари топширилмоқда. 
Мазкур тикув машиналари эҳтиёжманд хотин-қизларнинг турмуш шароитини яхшилаш, уларнинг доимий даромад манбаига эга бўлишларига кўмаклашиш, бандлигини таъминлаш мақсадида субсидия асосида бепул тақдим этилмоқда.
“Катта қашқар” маҳалла фуқаролар йиғинидаги ҳоким ёрдамчиси Соҳибназар Худойберганов томонидан “маҳаллабай” ўрганишлар давомида Нигора Исроилова “Аёллар дафтари”га киритилган. 
Ўз хонадонида тикувчилик фаолиятини йўлга қўйиш учун тикув машинаси олишда кўмак сўраган Нигоранинг мурожаати ечими узоққа чўзилмади. Туман ҳокимлиги ҳамда маҳаллабай ишлаш ва тадбиркорликни ривожлантириш маркази вакиллари томонидан унга замонавий тикув машинаси етказиб берилди.
Шунингдек, “Палахон” маҳалла фуқаролар йиғинида яшовчи Ҳавасхон Астанақуловага ҳам замонавий тикув машинаси топширилиб, иш фаолиятини йўлга қўйишда кўмаклашиш мақсадида фаол тадбиркорларга бириктирилди.