1. Бош сахифа
2. Янгиликлар

ДЕПУТАТЛАР АҲОЛИНИ БИРДАМЛИККА ЧАҚИРМОҚДА

×

Халқ депутатлари Учкўприк тумани кенгаши депутатлари хайрли тадбирни бошлаб беришди.

Мазкур хайрия акцияси доирасида депутатлар ўз сайлов округларида бўлиб, аҳолини эпидемияга қарши курашишда бирдамликка чақирмоқда.

Эҳтиёжманд оилаларга озиқ-овқат маҳсулотлари ва тиббиёт ниқоблари бепул тарқатилмоқда. Фуқароларга касалликни олдини олиш бўйича тушунтиришлар ҳамда дезинфекция ишларини амалга ошириш бўйича керакли тавсиялар берилмоқда. Бундан ташқари, нарх-наво ўсишининг олдини олиш мақсадида маҳаллалардаги тадбиркорлик субъектлари иш фаолияти кўздан кечирилди. Ногиронлиги бўлган хонадонлар ҳолидан хабар олинди.

Жумладан, туман кенгаши депутатлари – Авазбек Раҳмонов, Шерали Қобилов, Замирахон Ўлжаева, Исроилжон Исақов сайловчилари хонадонларига бориб, уларга озиқ-овқат маҳсулотлари тарқатиш билан биргаликда, бугунги синовли дамларни баҳамжиҳатликда енгиб ўтиш учун имкон қадар уларни ўз уйларида қолишларига ундашди.

– Бугунги кунда биз депутатлар ҳар доимгидан ҳам кўпроқ аҳоли ёнида бўлишимиз ва уларни қўллаб-қувватлашимиз шарт, – дейди Исроилжон Исақов. – Чунки бу синовни муҳтарам юртбошимиз таъкидлаганларидек, фақатгина бирлашиб енга оламиз. Барчани бирдамликка чорлаймиз.