1. Bosh sahifa
2. Yangiliklar

ТАДБИРКОРЛАР – ИҚТИСОДИЁТИМИЗ ТАЯНЧИ

---

Мамлакатимиз, хусусан, туманимиз иқтисодиётини янада ривожлантириш, юрт ободлиги ва халқ фаровонлигини яхшилашда эзгу ниятли, ташаббускор ва доимо ҳаёт билан ҳамнафас бўлган тадбиркорларнинг ҳиссаси беқиёсдир. Тадбиркорликни ривожлантириш ҳамда уларнинг фаолиятини ҳар томонлама қўллаб-қувватлаш мақсадида Учкўприк туманида “Тадбиркорлар уйи” ташкил этилган. “Тадбиркорлар уйи”да бевосита кичик бизнес ва тадбиркорликни ривожлантиришга масъул бўлган тузилмалар бир жойга жамланди. Натижада бу ерга мурожаат билан келган тадбиркорларнинг ҳар қандай масаласини шу жойнинг ўзида ҳал этиш имконияти яратилди. Тадбиркорлик субъектларига лойиҳадан тортиб, ер, бино, кредит ажратиш, муҳандислик тармоқларига уланиш, рўйхатдан ўтиш каби масалаларни тизимли ҳал этиш механизми ишлаб чиқилди. Учкўприк тумани ҳокими Акмалжон Маҳмудалиев ҳар ҳафтанинг душанба кунлари “Тадбиркорлар уйи”да бўлиб, тадбиркорларнинг муаммолари ва мурожаатларини ўрганади. Бош вазир қабулхонаси билан ҳамкорликда ташкилланган навбатдаги қабулда тадбиркорлик субъектлари ва ёшларнинг мурожаатлар тингланиб, уларга ижобий ечим топиш бўйича чоралар белгиланди. Бу галги мурожаатлар, асосан, банкдан имтиёзли кредит олиш, ер ажратиш, оилавий тадбиркорликни ривожлантириш каби масалаларга оид бўлди. Насрулло Обиджонов “Катта қўштепа” маҳалла фуқаролар йиғинида яшайди. Ўқишни тугатиб, чилангарга шогирд тушган. Бу ҳунарни пухта эгаллаб, эндиликда ўзининг тадбиркорлик фаолиятини бошлаш ниятида. Насрулло Обиджонов туман ҳокимининг қабулида асбоб-ускуналар сотиб олиш учун имтиёзли кредит ажратилишида амалий ёрдам сўраб мурожаат қилди. Унга бир ҳафта муддатда “Микрокредитбанк” томонидан 20 миллион сўм кредит бериладиган бўлди. Қабулда иштирок этган тадбиркорлик субъектлари томонидан билдирилган шу каби мурожаатларнинг аксариятига шу куннинг ўзида ижобий ечим топилди. Ҳал этилиши муддат талаб қилувчи мурожаатлар ижрога йўналтирилиб, масъуллар бириктирилди.