Учкўприк туманида мактабгача ва мактаб таълими тизими ходимлари иштирокида “Маҳоратли ўқитувчи - миллат таянчи” шиори остида IV устозлар миллий форуми ўтказилмоқда. Янги ўқув йилида тизимдаги муассасаларда таълим-тарбия сифатини ошириш, илғор методикалар ва таълим янгиликларини педагогларга етказиш мақсадида ташкил этилган тадбирда Учкўприк тумани ҳокими Қодиржон Эркабоев иштирок этди. Туман ҳокими сўнгги йилларда мамлакатимизда “Янги Ўзбекистон мактаб остонасидан бошланади” деган эзгу ғоя асосида таълим-тарбия тизимини тубдан такомиллаштириш, эртанги кунимизнинг муносиб давомчиларини камолга етказишнинг мустаҳкам ташкилий-ҳуқуқий механизмини яратиш борасида кенг кўламли ислоҳотлар амалга оширилаётганини таъкидлади. Шунингдек, тизимда сўнгги йилларда олиб борилаётган кенг кўламли ишлар ҳақида тўхталиб, тумандаги 56 та мактабда қарийб 43 минг ўқувчига 3636 минг нафар ўқитувчи ва мураббий таълим-тарбия бериб келаётгани ҳамда уларнинг 406 нафари олий тоифали устозлар эканини, бу кўрсаткич йилдан йилга ошиб бораётганини алоҳида қайд этди. Қайд этилишича, сўнгги бир йил ичида 2 та янги мактабгача таълим ташкилоти очилди ва 3 таси реконструкция қилинди. Бунинг натижасида 200 та тарбияланувчи ўрни яратилди. Шунингдек, турли лойиҳалар ижроси доирасида 5 та умумтаълим ҳамда 2 та касб-ҳунар мактабида қурилиш, реконструкция ва жиҳозлаш ишлари амалга оширилмоқда. Мазкур мақсадлар учун 40 миллиард сўмдан ортиқ маблағ йўналтирилди. Форум доирасида таълим ташкилотларида тарбиявий ишлар самарадорлигини оширишда тарбиячи-педагогларнинг роли, дарсликларда қўлланилган илғор методикалар, табиий фанларни ўқитишда янгича ёндашувлар, тадқиқотчилик, коммуникативлик, рақамли ва медиа саводхонлик, муаммоларни ҳал этиш кўникмаларини шакллантириш каби йўналишларда машғулотлар олиб борилмоқда.