Учкўприк туманидаги "T.M.M. Махситали Мамадалиевич" фермер хўжалигида ғўза майдонларида дефолиация тадбирларини амалга ошириш, пахта йиғим-теримига тайёргарлик кўриш ҳамда 2026 йил ҳосили учун бошоқли дон экинларини экиш масалаларига бағишланган вилоят кўргазмали семинари бўлиб ўтди. Тадбирда вилоят ҳокими Хайрулло Бозоров, вилоят Жамоатчилик назорати кенгаши аъзолари, туман ҳокимлари ва уларнинг ўринбосарлари, Ўсимликлар карантини ва ҳимояси бўлимлари масъуллари, кластерлар раҳбарлари, фермерлар ҳамда соҳага дахлдор идоралар мутасаддилари иштирок этди. Семинар доирасида пахта мавсумига пухта тайёргарлик кўриш, бошоқли дон экинлари экиш ишларини тизимли ташкил этиш каби масалалар муҳокама қилиниб, тегишли вазифалар белгилаб олинди. Дастлаб иштирокчилар фермер хўжалигида амалга оширилаётган ғўза дефолиация ишлари билан танишдилар. Вилоятимизда дефолиация ишларини самарали ташкил этиш учун 126 та отряд тузилганлиги, 25 августдан дори сепиш ишларини бошлаш, айниқса, пахта терим машиналари терадиган майдонларни сифатли дефолиация қилишга жиддий эътибор қаратиш лозимлиги мутахассислар томонидан тушунтирилди. Семинар давомида жорий йилги пахта мавсумига тайёргарлик ишлари бўйича вазифалар белгилаб берилди. Жорий йилда вилоятимизда 47 минг гектар майдонга “Наманган-77”, “С-8290”, “6775” каби маҳаллий навлар, 25 минг гектарга эса хитой навлари экилди. Шунингдек, 8 минг 332 гектарда 76 см қўшқатор усулида, 3 минг 836 гектарда эса Хитой тажрибаси асосида плёнка остига томчилатиб суғориш технологияси жорий этилди. Бу йил илк маротаба вилоятимиздаги 60 фоиз асосий пахта майдонидаги ҳосил терим машиналарида териб олинади. Ўтган йилда 60 та пахта терим машинаси мавсумда иштирок этган бўлса, жорий йилда 144 та Фарғонада ишлаб чиқарилган “Swan Cotton” замонавий машиналари олинди. Бу эса ҳосилнинг асосий қисмини машиналарда териб олиш имконини беради. — Президентимиз бошлаб берган ислоҳотлар ўз самарасини кўрсатмоқда. Хитой, Туркия ва Испания тажрибаларидан унумли фойдаланилмоқда. Тизим янгиланмоқда, даромад кўпаймоқда. Қишлоқ хўжалигида замонавий технологиялар ва дронлардан фойдаланиш орқали инсон омили кескин камаймоқда. Вилоятимизда пахтани тўлиқ терим машиналарида йиғиштириб олишни асосий мақсад қилганимиз ҳам шу ишларнинг амалий натижасидир, — деди вилоят ҳокими. Қўл меҳнати орқали йиғиб олиниши керак бўлган қолган майдонларда отрядлар ташкил этилиб, улар фермерлар билан шартнома асосида иш олиб бориши белгиланди. Терим жараёнини фермернинг ўзи бошқариши ва ташкил этиши зарурлиги таъкидланди. Мавсумда Учкўприк туманида фойдаланиш учун 12 та замонавий пахта териш машиналари калитлари ўз эгаларига топширилди. Шу ерда пахта теримида фаол қатнашган илғор теримчиларга совғалар топширилди. Шунингдек, ғалла экиш бўйича белгиланган тартиб-қоидаларга амал қилиш, сифатли уруғлик билан таъминлаш, замонавий сеялкалардан фойдаланиш ҳамда барча агротехник тадбирларни тўғри бажариш юзасидан амалий кўрсатмалар берилди. 2026 йил ҳосили учун вилоятда 88 минг 265 гектар майдонга ғалла экиш режалаштирилгани маълум қилинди. Нуронийларнинг дуолари билан бошоқли дон экинларини экиш жараёнлари бошлаб берилди.