Учкўприк тумани "Юлғунзор" маҳалла фуқаролар йиғинида замонавий Street workоut майдончаси бугун кенг жамоатчилик вакиллари иштирокида фойдаланишга топширилди. Спорт соҳаси масъуллари, нуронийлар ва фаоллар иштирок этган тантанали очилиш маросимида Учкўприк тумани ҳокими ўринбосари Шуҳратжон Позилов барчани янги спорт майдончаси ишга тушиши муносабати билан самимий табриклади. "Ташаббусли спорт" лойиҳаси доирасида қурилган, ёшларнинг спорт билан шуғулланиши учун барча шароитларни ўзида жам қилган ушбу спорт майдончаси 38-умумтаълим мактаби ҳудудидан ўрин олди. Стритбол ва workоut спорт турларини ривожлантириш учун ҳудудларда намунавий лойиҳалар асосида барпо этилаётган бундай спорт майдончалари маҳаллаларда истиқомат қилаётган ёшларнинг бадантарбия ва соғломлаштириш машқлари билан доимий шуғулланиши, улар орасида спортни оммалаштиришга хизмат қилиши билан муҳим аҳамият касб этади.